Mbok Met Hari Ibu Yeach

Sedudoshare - Ijek kelingan karo simbok kepiye saben nggugah tangi, ing sahur pisanan “Ngger, tangi… gek ndang sahur. Iki simbok masak jangan gori karo endog dadar senenganmu” karo dielus-elus bathukku. 

Ijek kepenak sing kemulan sarung, banjur luweh.....mblusuke sirah luweh jero ning bantal. Eaaalah, katresnane simbok ora nyeneni malah banjur nyedake kebule jangan gori ning sanding bantal. , nyaut kemulan kemul sarung banjur lungguh sendakep ning ngarep pawon supoyo anget hawane.

“Ngger, tak gaweke teh anget yo? mengko ndang sahur “.. ijeh kriyip-kriyip karo dilati iler sing kececer ning lambe sing rodo asin (hhuuucainggg!!!) , 

Krenteg nyowo rasane bali naliko nampani teh anget karo piring isi sego lawuh jangan gori sak endog dadare. Rampung sahur, piring mung digletekke ning ngarep pawon, banjur mblusuk maneh ning jero bantal karo kemulan sarung. 

Simbok….

Iki sahur pisanan ing sasi iki, senajan saiki ijeh urung ono sing gugah saur saben isuk, simbok ura usah kuwatir.

Wes di gugah karo mercon sing tak taleni ning bonggol obat nyamuk, yen wes genine tekan obat nyamuk mercone mengko mbledos dewe. sak RT tangi kabeh!!

Simbok sing sabar yo mbok, niyat merantau ning kuto iki golek dalan rejeki kanggo numpuk2 rengginang, klumpuk2 kanggo kawinan, senajan seprene urung ono sing gelem tak ajak kawinan sing penting niyate disek. !!!

Senajan ning perantauan iki dadi mung dadi tukang ngaduk semen ning negoro liyo, mugo2 lebaran mengko iso tuku oleh-oleh kanggo simbok.

Nanging... nanging…...nanging……

Roso kangen karo carane sing gugah aku tangi, karo kangen simbok wes nyepake piring isi sego, kangen karo simbok... ngenteni lawuh mateng lungguh ning ngarep pawon…….nanging kepiye meneh???

Simbok, saiki anakmu njaluk ngapuro.... urung iso niliki simbok.

Mung iso kirim donga ning perantauan, mugo Gusti paring ayem lan tentrem, katah rejeki dawa umur, Amin, selamat hari ibu.